Fréttir af þingflokki Pírata við upphaf 145. þings

Þingflokkur Pírata er klár í slaginn fyrir nýtt þing sem hefst á morgun. Nokkrar breytingar verða við upphaf þings. Helst er sú breyting að Jón Þór Ólafsson 10. þingmaður Reykjavíkurkjördæmis norður yfirgefur þingið og Ásta Guðrún Helgadóttir kemur til fullra starfa í hans stað.

Ásta HelgadóttirÁsta er með BA próf í sagnfræði frá Háskóla Íslands en hefur einnig verið við nám í Varsjá og Tehran. Þá hefur hún einnig verið í starfsnámi í Brussel og starfaði sem aðstoðarmaður Evrópuþingmannsins Amelíu Andersdóttur, sem kjörin var á Evrópuþingið fyrir sænska Pírata. Ásta hefur ferðast mikið um heiminn á undanförnum árum, meðal annars til Póllands, Íran, Georgíu, Þýskalands, Armeníu og víðar.

Okkur er sönn ánægja að taka á móti Ástu í þingflokk Pírata um leið og við kveðjum Jón Þór með söknuði.

Aðrar breytingar hjá okkur eru hin hefðbundna rótering á hlutverkaskipan. Birgitta Jónsdóttir tekur við þingflokksformennsku af Helga Hrafni Gunnarssyni en Helgi Hrafn verður formaður flokksins. Formennska í Pírötum er þó eingöngu formlegs eðlis vegna þinglegra prótócolla og hefur ekki í för með sér nein sérstök valdsvið eða ábyrgð. Þess vegna hefur formaður flokksins ávallt hafnað sérstöku launaálagi frá Alþingi fyrir formennskuna og mun Helgi Hrafn einnig hafna álaginu nú.

Þrjú forgangsmál þingmanna flokksins á þessu þingi eru:

Tillaga til þingsályktunar um fullgildingu OPCAT, sem mælir fyrir um eftirlit með stofnunum sem vista frelsissvipta einstaklinga. Fyrsti flutningsmaður er Birgitta Jónsdóttir.

Þingsályktunartillaga um sjálfstætt eftirlit með starfsemi og starfsháttum lögreglu. Fyrsti flutningsmaður er Helgi Hrafn Gunnarsson.

Frumvarp um upplýsinga- og sannleiksskyldu ráðherra. Fyrsti flutningsmaður er Ásta Guðrún Helgadóttir.

Þessi mál voru einnig flutt á síðasta þingi og við hvetjum ykkur til að kynna ykkur þau með því að fylgja tenglunum.

Píratar munu einnig leggja áherslu á fjölmörg önnur mál í samræmi við grunnstefnu flokksins. Höfundaréttarmál verða væntanlega í brennidepli, friðhelgismál, tjáningarfrelsi og önnur borgararéttindi auk lýðræðismála.

 

Meira bráðum 🙂