Ekki lengur refsivert að guðlasta!

Guðlast er ekki lengur refsivert á Íslandi og frá og með deginum í dag er fyllilega löglegt hér á landi að gera góðlátlegt grín að trúarbrögðum og trúarfígúrum hverskyns.

Frumvarp Pírata um brottfall 125. gr. almennra hegningarlaga var samþykkt á Alþingi rétt í þessu og þetta er því mikill gleðidagur fyrir bæði húmorista og alla vini tjáningarfrelsis.

Frumvarp Pírata var lagt fram í kjölfar mannskæðrar árásar á ritstjórn tímaritsins Charlie Hebdo í París í vor, en útgáfan hefur gert stólpagrín að Múhamed Spámanni. Alþingi Íslendinga hefur nú komið þeim mikilvægu skilaboðum á framfæri að frelsið verði ekki beygt fyrir mannskæðum árásum.

Spegillinn

Af þessu tilefni fylgir hér með hið fyrrum bannfærða tölublað Spegilsins frá Maí 1983, sem Vantrú hefur gert aðgengilegt á síðu sinni. Njótið lestursins!